काठमाडौं- जनता समाजवादी पार्टीलाई पुनर्गठित गर्ने अभियान थालेका पूर्व प्रधानमंत्री डा बाबुराम भट्टराईले सो पार्टी संकीर्ण क्षेत्रीय दलमा रुपान्तर भएको बताएका छन्। शनिबार उनकै नयाँ पार्टी नेपाल समाजवादी पार्टीको केन्द्रीय समितिको पहिलो पूर्ण बैठकलाई सम्बोधन गर्दै उनले जसपाले देशको वैकल्पिक राजनीतिक कार्यभार पूरा गर्न नसक्ने बताए।
‘हामीले बनाएको जनता समाजवादी पार्टी पनि प्रकारान्तरले पुरानै पार्टी जस्तो हुनुपुग्यो। हामीले त नेपालमा कांग्रेस र कम्युनिस्टको विकल्पमा, पुँजीवादी र साम्यवादी विचारको विकल्पमा, एउटा समाजवादी विचारसहितको वैकल्पिक शक्तिको परिकल्पना गरेका थियौँ। तर त्यहाँ परिस्थिति यस्तो सिर्जना भयो, नेतृत्वमा रहेका मानिसहरुले आफ्नो क्षेत्रगत र जातिगत संकीर्णताभन्दा माथि उठेर देश र जनताको हितलाई केन्द्रमा राख्न नसकेको देखियो', उनले भने।
जसपालाई नयाँ ढंगले पुनर्गठन गरेर जानुपर्छ भन्ने मान्यताका साथ आफूहरुले नेपाल समाजवादी पार्टी निर्माण गरेर अघि बढेको उनको भनाइ थियो। यसले पूर्णता पाउन अझै बाँकी रहेको उनले बताए। भट्टराईले भने, 'यो केन्द्रीय कमिटीको बैठकको उद्देश्य भनेको यो पुनर्गठित पार्टीको वैधानिकताको प्रक्रियालाई पूरा गर्ने त्यसपछि विभिन्न पक्षहरुसँग, राष्ट्रिय अन्तर्राष्ट्रिय परिस्थितिसम्म आकलन गर्दै आगामी दिनको कार्यभार तय गर्ने हाे। यो नै हाम्रो बैठकको मूल अजेन्डा हो।'
भट्टराईले नेपाल समाजवादी पार्टीले सडक, सदन र सरकारलाई हेर्ने पार्टीको दृष्टिकोणलाई पनि प्रष्ट पार्ने प्रयास गरे। 'सडक संघर्ष, चुनावी संघर्ष र सरकारमा गएर पनि गर्ने सुधारात्मक काम यी सबैको संयोजनबाट मात्रै हामीले अगाडि सारेको समावेशीता, संघीयता, सुशासन, समृद्धि, समाजवादको लक्ष्य प्राप्त हुन सक्छ भन्ने हाम्रो मान्यता छ', उनले भने, 'आगामी निर्वाचनको बारेमा पनि यो बैठकले गम्भीर छलफल गरेर कसरी प्रयोग गर्ने, यसको निम्ति हामी एक्लै अगाडि बढेर हुन्छ, या विचार मिल्ने नजिकका शक्तिहरुसँग सहकार्य गरेर हुन्छ, त्यसबारेमा पनि हामी गम्भीर विचार विमर्श गर्नेछौँ। त्यसको आधारमा निष्कर्ष निकाल्नेछौँ।'
भट्टराईले विज्ञानको आविष्कार थुप्रै प्रयोगबाट गुज्रेर मात्रै पुष्टि हुने भन्दै आफ्नो नयाँ राजनीतिक यात्रालाई पनि प्रयोगसँग तुलना गरे। 'दुई तीनवटा प्रयोग त हामीले गर्यौं। तर त्यसले मात्रै हामीले खोजेजस्तो परिणाम दिइरहेको छैन', उनले भने, 'अझै नेपाली समाजका जुन जटिलताहरु छन्। जटिल भूराजनीति छ। अन्तर्राष्ट्रिय परिवेश छ। त्यसमा हामीले अझै धेरै परीक्षणबाट गुज्रिनुपर्छ। यही अनुभूति गरेर हामीले यो पार्टीलाई पुनर्गठित र पुनर्संरचना गर्दै अहिले नेपाल समाजवादी पार्टी निर्माण गरेका छौं।'
वैकल्पिक राजनीतिक अभियान
उनले निर्वाचनको मुखमा एउटा नयाँ पार्टीको सुरुवात गर्दा अपेक्षित परिणाम ल्याउला वा नल्याउला भन्न नसक्ने भए पनि वैकल्पिक राजनीतिक अभियानमा लागेका मानिसहरुले निर्वाचनलाई संघर्षको साधन नै मान्ने बताए। उनले आफ्ना निम्ति सत्ता सबैथोक नभएको बताए। 'सत्ता भनेको समाज रुपान्तरणको एउटा साधन हो। हाम्रा निम्ति सडक, सदन र सरकार तीनवटै मोर्चाबाट, तीनवटै क्षेत्रबाट निरन्तर विभिन्न प्रकृतिका संघर्षहरु गरेर, सुधारहरु गरेर, रुपान्तरण गरेर, मात्रै नेपाली समाजका बाँकी कार्यभार पूरा गर्न सकिन्छ भन्ने हाम्राे मान्यता छ', उनले भने।
जसपा पुनर्गठन अभियान अन्तर्गत डा भट्टराई पक्षले निर्वाचन आयोगमा पहिल्यै दर्ता भएको समावेशी लोकतान्त्रिक पार्टीलाई अध्यावधिक गर्दै नेपाल समाजवादी पार्टी बनाउन निवेदन दिएको थियो। सोही अनुसार गत साउन १२ गते नयाँ पार्टी दर्ता भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789992067.jpeg)
-1786602170.png)
-1789631269.jpg)
